Süfrə

“Azərbaycan, sözsüz ki, gözəl ölkədir və onun paytaxtı Bakı yer üzünün ən qəşəng məkanlarından biridir. Onun ürəyi qədim İçərişəhər isə bu gün də gözəlliyi, istiliyi, təzadlı memarlığı və təkrarolunmaz küçələri, ən əsası isə burada yaşayan, onu daim canlı saxlayan sakinləri ilə aktuallığını qorumaqdadır. Məhz İçərişəhər Bakının dəyişməz simasıdır. Gördüyünüz süfrədə şəhər həyatının ayrılmaz, eyni zamanda ayrıca bir hissəsi olan, özünəməxsus həyat tərzinin nümunəsi köhnə damlar təsvir edilib. Burda quşbazlar Abşeronun səmasına ağ göyərçinləri uçurur, sanki insanlara sülh ismarışı verir, dillərdə dastan olan Abşeron üzümlükləri, ağ şanı, qara şanı, torpaqdan şirələnib, günəşdən cilvələnərək, Xəzərin havasında böyüyərək gözəlliyi, qaməti ilə insanları cəlb edir, evlərin divarları ilə qalxıb, binalara özünəməxsus görkəm verir. Bu gözəlliklərin kəsişməsi, qədim Bakının damları ilə bir ahəng yaradır və ənənədən doğub əbədiliyə yol açır. Bakı damları hələ qədim zamanlardan gecə-gündüz istifadə edilər, xanımlar burda samovar odlayıb çay gəstgahı qurar, paltar sərər, yun çırpar, yayın qızmar çağında axşamlar isə ailə bura yığışıb söhbət edərdi. Damların qıraqlarında güllər əkilər, bəzək vurulardı. Damları bəzəyən novalçalar isə sahibinin xasiyyəti, maraqları haqqında çox söz deyərdi… Ənənələrin yaşadılmasını, qeyri-maddi irsimizin təbliğini əməli işləri ilə gerçəkləşdirən ZADƏGAN bu dəfə də sizə yeni süfrəmizi eyni niyyətlə və bol ruzi-bərəkət arzusu ilə təqdim edir. Süfrəniz açıq, eviniz qonaq-qaralı olsun, əzizlərimiz!”